புரிய வைப்போம் பூக்களுக்கு.

                                                                                                                                                              அண்ணல் காந்தியும் , அப்துல் கலாமும்
வாழ்ந்த புண்ணிய பூமியிது -இன்று
அழுக்கேறிய மனதோடு ,
அரக்கர் கூட்டமொன்று,அலைந்து  திரிவதை ,
அழகு தேவதைகளுக்கு
புரிய வைப்போம்...

தொட்டதும் சுருங்கும் ,
தொட்டாசிணுங்கியல்ல ..நீ
தொட்டவுடன் எரிக்கும் அக்னி பிழம்பென்று
அறிய வைப்போம்..

ஆசை மொழி பேசிய ஹாசினியும்,
அழகு பூங்கோதை ஆஸிபாவும்
அசுர சாத்தானின் ஆசை தீயில்
அழிந்து எரிந்தது, இதுவே கடைசியாகட்டும்...

எரிந்த சாம்பலில், எழுந்து வரும் பீனிக்ஸாய்
எண்ணங்களை உருவேற்றி, வலுவூட்டுவோம்
வாரிசுகளின் வாழ்க்கையினை..

காலுக்கு சலங்கை கட்டும் நேரத்திலே,
கைகளுக்கு கத்திச்சண்டையும்
கற்றுக் கொடுப்போம்...

பெற்றவரையும், கூட பிறந்தவரையும் தவிர‌
மற்றவனை எல்லாம்,மாற்றானாய்
ஒதுக்கச்சொல்வோம்...

மையேந்தும் விழியொன்றில் கருணையும்,
மற்றொன்றில் காமுகனை கண்டறியும் திறனையும்
வளர்த்திடுவோம்,,

மற்றவர்க்கு நடக்கும் அநீதியையும் அறுத்தெறிய‌
மழலை மனதில், மஹிஸாசுர‌வர்த்தினியை
குடியேற்றுவோம்...

தொடுதலின் வகையினை தொலை நோக்கு பார்வையில்
சொல்லிதந்து ,தன்னை காத்து தரணியில்
வாழும் கலை வளர்ப்போம்.
    வாழ்க வருங்காலம்..
                                                                     அக்கறையுடன்,
                                                  உமாராணி கருணாமூர்த்தி.